如果你係住喺紐約，或者將來會來紐約，而你又想睇大峽谷，但又唔想飛去西岸，就一定唔好錯過呢個文章。因為我會介紹紐約州一個叫做美國東方大峽谷嘅地方，佢就係Lechworth State Park。
響呢個兩日一夜嘅Letchworth大峽谷自由行旅程，我會用Google Pixel 4a Vlog住去影相同拍片留低旅行記錄，影片以1080p30拍攝，收音就用Instamic Pro外置收音。如果大家對呢部電話有興趣，呢篇文都應該可以俾你睇到佢嘅影相質素。
我仲會響文章尾段加入呢一個州立公園嘅資料，同埋少少遊園嘅心得供大家參考。
如果大家鍾意睇片，可以直接睇我呢條YouTube片介紹有關呢個公園嘅風景：
明明就係玩一個公園，點解叫做紐約兩天遊呢？因為由NYC揸車過嚟要五個鐘頭左右，即日來回會好趕，所以最好中途搵個地方瞓一晚，文章尾段我會建議響邊度搵酒店。
揸車會途經多個中途停泊站，差唔多日落時間太陽光顏色好柔和，就影咗幾張相，你睇到Google Pixel 4a直出嘅相真係幾靚
美國嘅貨車都係呢種屙柏文嘅類型，其實都幾鬼型。
Mount Morris Dam
當日我係由Mount Morris入口進入園區，所以第一個景點就係Mount Morris Dam，可以離遠觀望個峽谷，老實講冇乜嘢睇，可以去個廁所就繼續出發。
呢個公園好大，一般都係揸車沿着Park Rd馬路玩，今次我就由北向南玩，頭一半行程都冇乜特別，都係一啲觀景台之類嘅，但尾段會越來越正，你可以留意一下。
Gardeau Overlook觀景台
呢個觀景台唔響主馬路旁邊，要特登揸一段仔入去，所以比較少人。
可以望到呢個公園條主要河流Genesee River，但有啲遠，之後有幾個景點可以好近望到。
Tea Table觀景台
呢個觀景台就叫做Tea Table，除咗可以近距離望到Genesee River之外，開始見到少少峽谷，觀景台上面仲有唔少枱櫈，加上樹陰同廁所，非常適合來野餐。
觀景台附近都有呢啲石壆，如果你帶腳架過嚟影相，都會好方便，因為可以擺上去。
畫面左上角就可以睇到峽谷形狀
Wolf Creek
呢度仲有條河仔，好多樹陰，又係野餐嘅好地方，或者影下慢快門流水
我去嗰時係2020年8月中，水溫都唔係凍
Snake Hill Overlook觀景台
呢度開始睇到峽谷岩石嘅層次
另外呢度可以睇到好多雀鳥，有指示牌介紹唔同嘅雀仔，我當日去睇到好多麻鷹，我段YouTube片都有影到佢哋，有興趣可以去睇吓。
我就係咁，架車揸到去邊，停到邊，玩到邊，絕對係一種好hea嘅玩法！
Great Bend Overlook觀景台
個人認為呢個係觀賞峽谷最靚嘅觀景台，同真大峽谷附近個馬蹄灣有少少相似，但規模細好多。
Google Pixel 4a得一個鏡頭，唔係好夠Wide，但影出嚟啲相嘅顏色係幾好嘅
對部Pixel 4a手機有興趣可以睇下呢段開箱片:)
好，繼續遊園。條河喺呢個位會轉一個彎，呢個觀景台就係因此命名嘅。
同之前個觀景台一樣，呢度都有好多麻鷹㗎
一直往南走去到咁上下就會進入瀑布區，多咗瀑布，少咗峽谷。
Lower Falls瀑布
下瀑布係園區裏面唯一一個真係要行嘅景點，因為泊車位唔響瀑布隔離。見到呢個牌記住往左行，其實唔難行，但對某一啲美國人來講係會有啲辛苦，對香港人來講濕濕碎。
因為只不過係行呢一啲樓梯。
見到呢舊石同埋河水，代表下瀑布就喺附近。
落樓梯去石橋之前，呢個位就係影Lower Falls瀑布最好嘅位置。
拉Wide少少俾大家睇吓，反而之後條石橋冇乜嘢影到。所以行埋一邊用石壆放好部相機，Zoom埋去就啱晒
上返樓梯，再向前行少少就見到瀑布嘅觀景台，但係佢係廢嘅，因為有一大半會比啲草同個斜坡遮住，所以響之前個樓梯位影係最靚嘅。
去到啱啱嘅觀景台之後，我建議沿路折返，因為繼續向前行，雖然都可以折返返去原先個分叉路，但係要上一條超級長命斜，唔建議。
Inspiration Point觀景台
呢個觀景台一定要來，因為一次過可以睇到Middle Falls中瀑布同Upper Falls上瀑布，有遠攝鏡嘅話就係時候攞出嚟。
呢個園區嘅指示牌好清晰，介紹得幾好，段文字唔會太長又易明，抵讚。但話時話，佢呢張下瀑布嘅相究竟係點影嘅呢？知道嘅話留言話我知呀。
其實由Tea Table觀景台直到Upper Falls上瀑布，係有一條行山徑連貫住嘅，所以如果鍾意行山嘅朋友，可以跟着粉紅色標記一路行一路觀光。
Glen Iris Inn旅館
園區裏面唯一一間餐廳同埋酒店，響正Middle Falls中瀑布隔離，幾方便。
由旅館對出草地望出去，就會見到呢個畫面。可能要遷就尊貴嘅住客，中瀑布旁邊係有射燈，應該係夜晚照亮條瀑布俾啲旅客去睇嘅。因為我冇試過留到去夜晚所以冇睇過，唔知靚唔靚。
冇錢住酒店嘅，園區都畫咗呢個觀景台出嚟，俾你近距離去欣賞個瀑布，響呢個位用手機影fit晒，仲可以響石壆上面放支腳架，用手機用慢快門影到佢一匹布咁樣，又或者開慢動作去影瀑布，我就選擇咗開慢動作，我條YouTube片有得睇😅
Upper Falls瀑布
同中瀑布共享同一個停車場嘅就係Upper Falls上瀑布喇，瀑布前面有唔少觀景位俾你去影相，而瀑布上面仲有條鐵路橋，如果咁啱遇到有火車經過，應該會幾靚。
相比起中瀑布，你同上瀑布嘅距離係會有啲遠，最好有遠攝鏡頭
雖然車程有啲長，但呢個州立公園絕對值得過嚟睇吓，而且附近仲有好多其他景點可以玩幾日，呢段時間冇得出國，可以考慮過嚟玩。
Google Pixel 4a 香港人實測當Vlog相機用，我對呢部Google Pixel 4a 評價係機身細，影相靚，拍片一般般，唔夠wide，顔色唔錯。
Letchworth State Park NJ： https://goo.gl/maps/HnnpRW4o1TtwX6hy9
最後同大家分享吓4個小小心得，等大家下次嚟玩得輕鬆啲：
- 建議由南邊向北邊玩好啲，上午人少啲，睇瀑布會冇咁迫，如果你會行山玩，去到GreatBend Overlook觀景台就啱啱好5:00左右，日落時分果一度會好靚
- 下晝五點到第二日朝頭早九點入園區係免費嘅，其餘時間一部車收$10，九點前，或五點後陽光比較柔和，影相拍片會仲靚啲，但陰影會多啲。
- 雖然有好多個觀景台，但唔少景點同觀景台距離都有啲遠，淨係用手機唔係太夠，帶得Zoom嘅相機會，影到多好多嘢。
- 記住帶一對唔怕污糟嘅行山鞋，你見到我啲相都係陽光普照，其實我之後再去一次，係啱啱落完雨，行到去下瀑布嗰時，好似玩緊泥漿摔角咁樣，我朋友啲靚波鞋污糟晒。
- 如果你由曼克頓過嚟，我建議你響Corning NY搵間酒店住，因為嗰度比較乾淨，酒店多餐廳又多，而且順路。
鍾意呢段文章嘅，記住幫我分享出去，我之後仲會介紹其他美國紐約附近嘅景點，有興趣嘅話可以響Ublog或者下面嘅社交媒體follow我。
我係大男孩，下次見拜拜。
大男孩Youtube
http://www.youtube.com/hkbigboy
大男孩Instagram
http://www.instagram.com/hk_bigboy
大男孩Blogger
https://hkbigboy.blogspot.com/
大男孩Facebook