係時候去大棠楓香林影相拍片！
一年一度嘅元朗大棠紅葉季節開始咗，大家應該響FB／IG見到好多紅葉嘅靚相片，如果你想用手機影到好靚嘅大棠紅葉嘅話，呢篇文章就啱你喇，我會同您分享三個手機影紅葉嘅心得（其中一點係絕對可以改善紅葉相片既立體感），令您都可以用iPhone（或Android Phone）影到紅葉大作。另外會講到用360相機拍攝紅葉特效短片既方法，畫面效果可能係你意想不到咁特別。文章末段加入大棠紅葉2020交通懶人包，等你可以快啲去影到靚。
- 3個手機拍攝紅葉密技
- 360相機紅葉特效影片教學
- 大棠楓香林交通懶人包
要影到漂亮嘅大棠楓香林照片，其實唔一定用部大相機，只要懂得使用，手機攝影都可以影得好靚，上次分享左點用iPhone影螢火蟲，今次就黎影下紅葉！
手機大棠紅葉拍攝技巧
紅葉要影得靚，除咗老生常談嗰啲建議：日出日落時分去影之外，我覺得其實有三點：
1－要背光影，唔好正光影
其實葉子變紅之後係會有啲透明嘅，背光影讓陽光穿透葉面，再投射到相機鏡頭嘅話，葉嘅顏色就好鮮豔，好似發光一樣咁靚。
相反正光去影畫面會比較平面，缺乏立體感。同埋正光影會影到好多葉面嘅反光冇咁靚，第三點講嗰件法寶可以解決一部分呢個問題，記得繼續睇落去😀
2－多用遠攝鏡頭，少用廣角鏡去影
廣角鏡雖然係影風景必用鏡頭，但畫面太闊會好雜亂，令觀看者唔知望邊度好
相反用2X鏡頭或者Zoom埋去影，可以集中呈現你想觀眾睇到個畫面出嚟。
加上大部份人都會用廣角鏡去影，影出o黎啲相個個都差唔多，想突圍而出多啲用遠攝鏡頭啦。
另外元朗大棠楓香林紅葉多，但人頭更加多，用2X鏡頭可以幫你避都唔少人頭㗎😆
3－加塊CPL偏光鏡去影去除葉面反光
樹葉相有一層表皮蠟質，會反光，日頭影太陽光會通過葉面呢層蠟反射到去相機，會遮蓋葉子本身的顏色，CPL偏光鏡就係幫你去除呢啲反光，令到葉子嘅顏色忠實地呈現出嚟。
唔講您可能唔知，單純去除反光就可以令張相既顏色還原度激增，呢段片可以睇到實時去除反光嘅效果：
比相機鏡頭用嘅偏光鏡好大塊，唔適合手機使用，我就用緊呢塊kase CPL偏光鏡，直徑41 mm，細細塊足夠cover iPhone嗰三個鏡頭，直接夾在iPhone鏡頭前面就用得。
有興趣睇更多用iPhone拍攝嘅教學，可以睇呢度：iPhone拍攝教學系列
用手機影紅葉都可以好靚，但因為方便所以個個都有機會做到。想玩特別一點？可以試吓玩360相機，下面就係360相機拍攝紅葉嘅分享。
360相機影紅葉特效短片
360相機近年流行起來，使用範疇不再局限於拍攝VR影片（要帶VR 眼鏡睇果d），近年相機廠商加入360特效功能，令用家可以影到很多有趣嘅360特效相片或影片。
其中我覺得扮無人機，同埋旋轉鏡頭就非常適合去影大棠紅葉嗰時用，呢兩個效果都係一般手機影唔到出嚟嘅。呢段片就係用Insta360 One R 360相機示範既特效影片拍攝教學。
360相機牌子唔多，出名嘅有Inst360，GoPro，Ricoh，當中最流行就係Insta360，大男孩就用緊呢兩部既360相機：
- Insta360 One R 模組化設計，有得換鏡頭，裸機防水。Amazon都有得賣：Amazon直送香港免稅免運 (Affiliate)
- Insta360 ONE X 簡單一體化設計，不防水，入門首選
之前出過一段Insta360 ONE R開箱文，有興趣可以去睇睇
大男孩Nick既YouTube頻道有大量360相機拍攝教學，有興趣記得去睇下啊。
大棠紅葉交通
睇完拍攝教學，係咪好想即刻去大棠影紅葉呢？就同大家講吓交通點安排啦。前往元朗大棠楓香林嘅公眾交通工具有幾個選擇：
1. MTR巴士K66A 特別班次 （紅葉專巴）假日限定
由西鐵朗屏站直達大棠總站，沿大棠山道上埋山，中途不停站，上車位為朗屏站B2出口悅屏樓附近，只限星期六、日及公眾假期，成人每位$4.9，K66A詳情。
2. 港鐵巴士K66
平日無K66A就要搭普通K66，大棠紅葉季節期間不停大棠山路站，要沿大棠山道行上去，成人每位$4.9，K66詳情
3. 的士
可以由MTR元朗站出發，直上沿大棠山道盡頭開始行，$60-70
大棠紅葉 泊車
想揸車去大棠楓香林？泊車唔容易啊！留意返大棠山道停車場由2020年12月5日（星期六）至2021年1月17日（星期日）逢星期六、日及公眾假期上午7點至晚上7點間歇性封閉，唔俾任何車輛進入，大棠臨時交通安排詳情。
Bonus Tip － 大棠楓香林紅葉情報
日本紅葉情報大家就應該睇得多，原來而家香港漁農自然護理署都有位大棠楓香林出咗個紅葉情報，但資訊就簡陋到呢...不過都算有心嘅
大家今年會唔會去睇大棠紅葉呢？響下面留言話我知啊，下篇再會，拜拜。
As an Amazon Associate I earn from qualifying purchases.